မြန်မာပြည်ကိုကွယ် လွမ်းတယ်

ရင်ဂို ဆိုထားတဲ့ ပြည်တော်ပြန် ပလေးဘွိုင် ဆိုတဲ့သီချင်းလေးကို ရှာနေတာကြာပါပြီ။ ဒီနေ့တော့ youtube မှာတွေ့တာနဲ့ တင်လိုက်တာပါ။ အဝေးရောက် မြန်မာတွေအတွက် အလွမ်းပြေသီချင်းလေးဖြစ်သလို တချိန်ချိန်တော့ အိမ်ပြန်မယ်ဆိုတဲ့ စိတ်ကလေးဖြစ်မိမှာပါပဲ။ စာသားလေးတွေက ရင်ထဲကို တကယ်ထိပါတယ်။ ရင်ဂိုလိုပဲ နှင်းလဲ လွမ်းပါတယ်။ မြန်မာပြည်မပြန်ခင် နောက်ဆုံးတင်တဲ့ ပိုစ်လေးလဲဖြစ်ပါတယ်။

၁ နှစ်ပြည့် အပြန်ခရီး

အချိန်တွေဆိုတာက စောင့်နေရရင်သာ ကြာတယ်ထင်တာပါ။ ကုန်သွားပြီးလို့ရှိရင်တော့ မြန်တယ်လို့ ထင်မိပြန်တယ်။ အခုလည်း နှင်း ထိုင်ဝမ်ကို ပြန်လာတာ ၁ နှစ်ပြည့်တော့မယ်။ မနှစ်က ဇူလိုင် ၁၂ ရက်နေ့ မြန်မာပြည်ကနေပြန်လာခဲ့ပါတယ်။ အခုလည်း ဒီဇူလိုင် ၁၂ ရက်နေ့မှာပဲ မြန်မာပြည်ကို ပြန်တော့မယ်။ တမင်တကာ လုပ်ယူထားရင်တောင် အခုလို တိုက်ဆိုင်ပါ့မလားဆို မပြောနိုင်ပါဘူး။ အခုတော့ ၁ နှစ် တင်းတင်းပြည့်တဲ့နေ့မှာတော့ အမိမြန်မာပြည်ကို ပြန်နိုင်ပါပြီ။ အကျိုးအကြောင်းတွေက ဒီအချိန်မှာ တော်တော်တိုက်ဆိုင်တယ်ပြောရမယ်။ အလုပ်ကလဲ ဖိအားများလာသလို အိမ်ကလဲပြန်ခေါ်ချိန်ဖြစ်နေပါတယ်။ တခြားအကြောင်းအရာတွေလဲ တိုက်ဆိုင်လာပါတယ်။

ဖြစ်ချိန်တန်ရင် ဘာနဲ့မှတားဆီးလို့မရပါဘူး။ အချိန်တန်တော့လဲ အိမ်ပြန်နိုင်ပါပြီ။ ၁၂ ရက်နေ့ကျရင်တော့ နှင်းတယောက် မြန်မာပြည်ကိုပြန်ရောက်နေပါပြီ။ ဘလော့ရေးတာကိုတော့ တော်တော်နဲ့ လုပ်ဖြစ်မှာမဟုတ်ပါဘူး။ ဒါပေမယ့် သူငယ်ချင်းမိတ်ဆွေတွေအားလုံးကိုတော့ ရင်ထဲကနေ အမြဲသိရနေမှာပါ။

good bye Taiwan

နှင်းစိတ်ထဲမှာ တော်တော်လဲ ၀မ်းနည်းမိသလို စိတ်ထဲလဲ မကောင်းပါဘူး။ ထိုင်ဝမ်ကို ပြန်လာမယ်ပြောတော့ မောင်လေးက တားပါတယ်။ ပါပါးနဲ့ မာမားကလဲ သမီး စိတ်ထဲသေချာစဉ်းစားပြီးပြီလားလို့ ထပ်ခါတလဲလဲ မေးပါတယ်။ မောင်လေးကတော့ ကိုယ့်စိတ်ကိုနိုင်မှပြန်သွားနော်လို့ သတိပေးပါတယ်။ ဘာပဲဖြစ်ဖြစ် တခါမှ မိဘနဲ့ မခွဲဘူးလို့ ခွဲပြီးကိုယ့်ဘ၀ကိုယ် ရပ်ကြည့်မယ်လို့ စဉ်းစားပြီး ပြန်ထွက်လာခဲ့ပါတယ်။ အရင်နေတုန်းကတော့ မိသားစုလိုက်ဖြစ်လို့ ဘာခံစားချက်မှ သိပ်ပြီးမရှိပါဘူး။ အခုတခါက မိဘတွေက ပြန်မလိုက်လာတဲ့အတွက် မိဘတွေကိုလွမ်းတဲ့စိတ်ရယ် အားငယ်စိတ်ရယ်က ရှိနေပါတယ်။ ဦးလေးအဒေါ်တွေ ဘယ်လောက်ပဲ ဂရုစိုက်ပါတယ်ပြောပြော မိဘတွေကိုလွမ်းမိပါတယ်။

အပြင်လောကအကြောင်း သေချာမသိသေးတော့ အခက်အခဲတခုခုတွေ့လိုက်တာနဲ့ မျက်ရည်ကျလွယ်နေတယ်။ မိဘတွေအရိပ်မှာနေတုန်းကတော့ အပူအပင်ကင်းကင်းနဲ့ နေနိုင်ပါတယ်။ လူတွေအပေါ် မေတ္တာထားနိုင်ဖို့ အမြဲမှာနေတဲ့ မာမားစကားကို မမေ့ပါဘူး။ မပျော်ရင် ပြန်လာဖို့ မှာလိုက်တဲ့ ပါပါးစကားကလည်း နှင်းအတွက် အားတခုပါပဲ။ လူတွေအပေါ် မမုန်းပါဘူး။ ဒါပေမယ့် လူတွေအလိုကျ ဘယ်လိုများ လိုက်နေရမလဲဆိုတာ မသိပါဘူး။ ကိုယ်နေတတ်သလို နေတော့လဲ ကိုယ့်အတွက်နဲ့ သူတို့မှာ အကုသိုလ်များနေပါတယ်။ တကယ်ပါ ကိုယ့်အတွက်နဲ့ ဘယ်သူ့ကိုမှ စိတ်မဆင်းရဲစေချင်ပါဘူး။ ကိုယ့်ကြောင့်ပျော်နေတာမျိုးပဲ ဖြစ်စေချင်တာပါ။ ဒါပေမယ့် ဘ၀ဆိုတာ ဖြစ်ချင်တိုင်းမဖြစ်တဲ့အရာပါ။

နိုင်ငံရပ်ခြားမှာ အရာရာတိုးတက်ပါတယ်။ ဒါပေမယ့် စိတ်ချမ်းသာမှုဆိုတာ ဘယ်မှာလဲလို့ မေးရမလိုဖြစ်နေတယ်။ ဘာသာရေး လူမှုရေး ဘာမှမတူတဲ့အတွက် မြန်မာတွေအနေနဲ့ တော်တော်နေရခက်ပါတယ်။ ဘာမဆို သည်းခံပါတယ်။ ရန်လဲမဖြစ်တတ်သလို ရန်ဖြစ်ရတာကိုလည်း ရှက်တဲ့အတွက် ဘာပဲ ဖြစ်လာလာ ကိုယ်လုပ်လို့ ဖြစ်ရတာဆိုတဲ့ စိတ်နဲ့ ကိုယ့်ကိုကိုပဲ အပြစ်တင်မိပါတယ်။ ကိုယ့်စိတ်ကိုပဲ ပြုပြင်မိပါတယ်။ ဒါပေမယ့် ကိုယ့်ကြောင့်သူတပါးတွေ နေ့တိုင်း စိတ်ညစ်နေပြီး ကိုယ့်ကို စိတ်ထဲမကျေနပ်တဲ့သူတို့အတွက် ကိုယ်သာမရှိနေရင် ပိုကောင်းမယ်လို့ တွေးမိပြီး ဆုံးဖြတ်ချက်တခုချလိုက်ပါတယ်။ နှင်းကိုယ်တိုင်လဲ နားညည်းမခံချင်သလို သူတပါးကိုလည်း အပြစ်မမြင်ချင်ပါဘူး။ ဒါပေမယ့် လူ့စိတ်ဆိုတာ အမြဲတည်ငြိမ်နေတာမဟုတ်တော့လဲ ကိုယ်ဘယ်လောက်အထိ သည်းခံနိုင်မလဲဆိုတာမသိတဲ့အတွက် ဆုံးဖြတ်လိုက်တာပါ။

မကြာခင်ရက်ပိုင်းအတွင်းမှာ နှင်းချစ်ရတဲ့ အေးချမ်းလှတဲ့ မိဘရင်ခွင်မှာပဲ ပြန်ခိုလှုံခွင့်ရတော့မှာဖြစ်ပါတယ်။ တနှစ်ဆိုတဲ့အချိန်ကာလအတွင်းမှာ အတွေ့အကြုံတွေအများကြီးရခဲ့တဲ့အတွက် နှင်းအတွက်တော့ တန်ဖိုးရှိပါတယ်။ အခုလိုတယောက်ထဲရင်ဆိုင်ကြည့်မှ မိဘရဲ့ရင်ခွင်ဟာ ပိုအေးချမ်းတယ်ဆိုတာ သိလာပါတယ်။ ဒီတခါပြန်ပြီးရင်တော့ မိဘရိပ်ကနေ ထပ်ထွက်မသွားဖို့ ဆုံးဖြတ်ထားပါတယ်။

ငွေနဲ့မလဲနိုင်တဲ့အရာ

နှင်းတို့တွေ ငွေဆိုတဲ့အရာကို လိုအပ်ကြတာ လူတိုင်းအသိပါ။ ငွေဟာ အရာတော်တော်များများကို ဖန်တီးလို့ရပေမယ့် လူတွေရဲ့ပျော်ရွှင်မှု ချမ်းမြေ့မှု ချစ်ခြင်းမေတ္တာတွေကိုတော့ မဖန်တီးနိုင်ပါဘူး။ အလုပ်လုပ်ရင် ငွေရမယ်ဆိုတာသိပေမယ့် အလုပ်ထဲမှာ မပျော်ရွှင်ဘူးဆိုရင်တော့ ရလာတဲ့ငွေကလဲ တခြားအရာအတွက်အသုံးဝင်ပေမယ့် မိမိရဲ့ပျော်ရွှင်မှုကတော့ မရတော့ပါဘူး။

အလုပ်ထဲမှာ ပျော်ရွှင်မှုရှိမှလဲ အလုပ်ကိုအကောင်းဆုံးဖြစ်အောင် စွမ်းဆောင်နိုင်မှာပါ။ အလုပ်ထဲမှာ မပျော်ရွှင်တော့ဘူးဆိုရင်တော့ မနက်လင်းတာနဲ့ အလုပ်သွားရမှာ ကြောက်လာပါတယ်။ ကိုယ့်စိတ်ကမပျော်နိုင်တော့ ဘာလုပ်လုပ်အဆင်ပြေတယ်ဆိုတာ နည်းလာပါတယ်။ အခက်အခဲတခုခုဖြစ်တာနဲ့ စ်ိတ်ဓါတ်ကျလာတယ်။ ကုန်သွားတဲ့အချိန်တွေက ဘယ်တော့မှ အစားထိုးပြန်မရနိုင်တော့ဘူး။ အဲဒီအချိန်တွေကို စိတ်ညစ်ခံပြီးကုန်ဆုံးလိုက်မယ်ဆိုရင်တော့ တကယ်နှမျောဖို့ကောင်းမှာပါ။ တချို့ကလဲ မပျော်လို့မလုပ်ရင် ဘယ်ကပိုက်ဆံနဲ့သုံးမလဲလို့ ပြောမှာပါ။ တကယ်လို့ အတင်းကြိတ်မှိတ်ပြီးလုပ်လို့ မွန်ကျပ်လာတဲ့အချိန် ထွက်ပေါက်ပေးတာမှားတဲ့အခါ ဘ၀ပါဆုံးသွားနိုင်ပါတယ်။ ပိုက်ဆံဆိုတာထက် ကိုယ့်အလုပ်မှာမပျော်တော့ရင် အလုပ်သစ်ပြောင်းဖို့ ကြိုးစားသင့်တယ်။

ကျောင်းသားဆိုတာ ကျောင်းနေရတာ ကျောင်းသွားရတာကိုပျော်မှ စာသင်ချင်တဲ့စိတ်ရှိမှာပါ။ အလုပ်လုပ်တဲ့သူကလဲ အလုပ်ထဲမှာပျော်မှ အလုပ်လုပ်ချင်စိတ်ရှိမှာပါ။

ဘာလို့များ ဒီလောက်တောင် ပြောနေတာလဲလို့တွေးနေမှာပဲနော်။ အခု နှင်းတယောက်လဲ ငွေနဲ့လဲလို့မရတဲ့ ပျော်ရွှင်မှုအတွက် အလုပ်ကနေ နှုတ်ထွက်စာတင်ပြီး အိမ်မှာပဲ ကွန်ပျုတာကလိနေပါတယ်။