နေ့မြင်ညပျောက်

မတည်မြဲခြင်း ဆိုတာကို လူတွေဟာ သတိမပြုမိကြဘူး။ ဘယ်အရာကိုမှ ကိုယ်အပိုင်စိုးရတယ်ဆိုတာ လောကမှာမရှိပါဘူး။ ဒါပေမယ့် လူတစ်ချို့ဟာ ဒီအရာတွေကို မေ့နေကြတယ်။ ငါပိုင်ဆိုင်တဲ့ ဥစ္စာပစ္စည်း၊ ငါမွေးထားတဲ့ ငါ့သားသမီး၊ ငါ့ရာထူး စတဲ့ ငါစွဲတွေကို ထားနေသရွေ့ သူတို့ရဲ့ စိတ်တွေဟာလဲ မအေးချမ်းကြပါဘူး။ အတိတ်ဘ၀ ကုသိုလ်ကံ ကောင်းလို့ ကိုယ်ပြုခဲ့တဲ့ ကောင်းကျိုးတွေကြောင့် ရလာတဲ့အရာတွေပါ။ ကိုယ်ရှာထားတဲ့ စည်းစိမ်တွေကလဲ အမြဲတမ်း တည်မြဲနေမယ့်အရာမဟုတ်ပါဘူး။ ဒီနေ့ ရှိနေပေမယ့် နောက်နေ့ရှိချင်မှ ရှိတော့မယ့်အရာတွေပါ။ ကိုယ်မွေးထားတဲ့ သားသမီးတွေကရော အမြဲတမ်း ကိုယ်နဲ့အတူ ရှိနေမှာမှ မဟုတ်တာ။ အချိန်တန်အရွယ်ရောက်ရင် ကိုယ့်ကိုခွဲသွားမှာပါ။ ကိုယ့်မှာ အခုရှိပါတယ်ဆိုတဲ့ ရာထူး ဂုဏ်ထူးတွေကရော အမြဲတမ်းရှိနေမှာ မဟုတ်ပါဘူး။ အဲဒီဟာတွေအပေါ်မှာ အစွဲတွေ ထားနေမယ်ဆိုရင် လက်ရှိဘ၀မှာလဲ မအေးချမ်းနိုင်သလို ကိုယ်သေသွားခဲ့ရင်လဲ ဒီစွဲလမ်းတဲ့ စိတ်တွေကြောင့် သံသရာမှာလဲ မကောင်းနိုင်ပါဘူး။ ဖြစ်ပြီးရင် ပျက်မှာပါပဲ။ ဖြစ်ပြီးပြီ မပျက်နိုင်တော့ပါဘူး ရယ်လို့ ဘုရားကလဲ မပြောခဲ့ပါဘူး။ မြတ်စွာဘုရားတောင်မှ ဖြစ်ပျက်သဘောကို အလွန်ဆန်နိုင်ခဲ့ပါဘူး။
လူ့ဘ၀ဆိုတာ ခဏလေးပါ။ ကုသိုလ်ကံထူးလို့ လူရယ်လို့ လာဖြစ်ရတာပါ။ လူရယ်လို့ ဖြစ်လာပြီးတော့ မြတ်ဘုရားရဲ့ အဆုံးအမတွေကို နာကြားခွင့်ရလို့ ပိုပြီးကံကောင်းပါတယ်။ လုပ်ခွင့်ကြုံတုန်း လုပ်လို့ရနေတဲ့ အချိန်မှာ ကိုယ့်ဘ၀အတွက် လောကုတ္တရာအတွက် ကြိုးစားပြီး ကျင့်ကြံရမှာပါ။ လောကီအတွက် မကြိုးစားရဘူးလို့ မပြောပါဘူး။ အူမတောင့်မှ သီလစောင့်နိုင်မယ်ဆိုတာ လူတိုင်းသိပါတယ်။ ဒါပေမယ့် လောဘဆိုတာကို ထိန်းနိုင်ရပါမယ်။ အခုတစ်လော မြန်မာနိုင်ငံမှာ မီးတွေလောင်လို့ အပူသောကတွေနဲ့ ကြုံနေရတယ်။ ဒီနေ့ရှိနေတဲ့ ပစ္စည်းတွေ အချိန်ပိုင်းအတွင်းမှာ ပြာမှုန့်တွေအဖြစ်ပြောင်းလဲ သွားတယ်။ မတည်မြဲခြင်း တွေကို တွေ့မြင်နေရတာပါ။ အရာဝတ္ထု ပစ္စည်းဆိုတာ မတည်မြဲဘူး။ အဲဒီလိုပဲ လူရယ်လို့ မွေးဖွားလာပြီးရင်လဲ သေဆုံးကြရမှာပါ။ မသေဆုံးခင် လောကုတ္တရာအတွက် ကြိုးစားအားထုတ်သွားရမယ်။