မြန်မာပြည်မှာ မွေးပြီး မြန်မာပြည်မှာ ကြီးခဲ့လို့ ဘာလူမျိုးပဲ ဖြစ်နေပါစေ နိုင်ငံရပ်ခြားကို ရောက်လာရင် အားလုံးကို မြန်မာလို့ပဲ သတ်မှတ်ကြပါတယ်။ အခြေအနေအမျိုးမျိုးကြောင့် မြန်မာပြည်ကို မပြန်နိုင်ပဲ နိုင်ငံရပ်ခြားမှာပဲ အခြေချနေသွားကြမယ့် မြန်မာတွေလဲ အများအပြားပါပဲ။ ဒီလိုမိသားစုတွေထဲက ကလေးတွေကို မြန်မာစကားလေးတော့ ပြောတတ်စေချင်တယ်။ တစ်ချို့ ကလေးတွေက တိုင်းတစ်ပါးကို ရောက်မှ မွေးကြတော့ ရောက်နေတဲ့ နိုင်ငံစကားကိုပဲ ပြောတတ်တော့တယ်။ မိဘတွေရဲ့ ဘာသာစကားကို မပြောတတ်ကြပါဘူး။ ဒါတွေဟာ မိဘတွေကိုယ်တိုင်က မအားလပ်လို့ သင်မပေးနိုင်တာလဲ ဖြစ်နိုင်ပါတယ်။ ဒါမှမဟုတ် မြန်မာပြည်ကိုမှ မပြန်တော့တာ သင်စရာမလိုတော့ပါဘူး ဆိုတဲ့ အတွေးတွေကြောင့်လဲ ဖြစ်နိုင်ပါတယ်။ နှင်း တွေဘူးတဲ့ မိသားစုလေး ၁ ခုရှိတယ်။ ဒီမိသားစုလေးရဲ့ သမီးလေးကို ထိုင်ဝမ်မှာမွေးခဲ့တယ်။ အဖေနဲ့ အမေ ၂ ယောက်စလုံးရဲ့ မိသားစုတွေ အားလုံးက ထိုင်ဝမ်မှာပဲ အခြေချကြတဲ့ မိသားစုတွေပါ။ ၂ ဘက်မိဘဘိုးဘွားတွေ အားလုံး ထိုင်ဝမ်မှာ ရှိနေပေမယ့် အမေလုပ်တဲ့ သူဟာ သမီးကို မြန်မာလိုသင်ပေးတယ်။ မြန်မာဘုရားရှစ်ခိုးတွေ သင်ပေးတယ်။ ကလေးမှတ်လို့လွယ်မယ့် စကားတွေကို သင်ပေးတယ်။ အမေဘက်က ရခိုင်တရုတ် ဆိုတော့ ကလေးကို ရခိုင်လိုလဲ သင်ပေးတယ်။ အမေလုပ်သူကို “ဘာလို့မြန်မာလိုရော ရခိုင်လိုရော သင်ပေးနေတာလဲ”လို့ မေးကြည့်မိတယ်။ ထိုင်ဝမ်မှာပဲ နေမယ့် မိသားစုက မြန်မာလို သင်ပေးနေတာကို စိတ်ဝင်စားမိတယ်။ အမေလုပ်သူပြောတာက “ငါတို့ ထိုင်ဝမ်မှာနေမယ်ဆိုပေမယ့် မြန်မာတွေလေ။ မြန်မာပြည်မှာ မနေပေမယ့်လဲ တတ်ထားတော့ ကောင်းတာပေါ့။ ပြီးတော့ ငါတို့က ရခိုင်ကလေ ဒါကြောင့် ရခိုင်လိုလဲ သင်ပေးတာ။ သမီးကို နဲနဲ ကြီးရင် မြန်မာပြည်ကို သွားလည်ခိုင်းမယ်” တဲ့။ ကလေးမလေးကို မြန်မာပြည်ကိုသိလားလို့ မေးတော့ သိတယ်။ သူသွားလည်ချင်ပါတယ်တဲ့။ ထိုင်ဝမ်မှာနေမယ့် မိသားစုတွေ ဖြစ်ပေမယ့် သူတို့တွေရဲ့ စိတ်ထဲမှာ မြန်မာပြည်ဆိုတာ ရှိနေတယ်။ သူတို့ မိသားစုရဲ့ စိတ်ဓာတ်လေးကိုလဲ လေးစားမိတယ်။ ဘယ်နိုင်ငံမှာပဲ နေနေ စိတ်ထဲမှာ မြန်မာဆိုတဲ့ စိတ်ကလေးနဲ့ ကိုယ်မိခင်နိုင်ငံကို မမေ့တဲ့ ဒီမိသားစုလေးလိုမျိုး တစ်ခြားသော မြန်မာတွေရဲ့ စိတ်ထဲမှာလဲ ရှိစေချင်ပါတယ်။
1 comment:
အဲဒီလို မိသားစုမျိုးက တော်တော်ကြီးရှားနေပါပြီ ... ၁% လောက်ပဲ ရှိလိမ့်မယ် :D
Post a Comment