ထိုင်ဝမ်ရဲ့ အမြင့်ဆုံးနေရာ Alishan

အ၀င်မုဒ်ဦး

နေမင်းကြီး လင်းရောင်သန်းလာပြီ

နံနက်ခင်းရောင်ခြည်

နေမင်းထွက်အလာကိုစောင့်နေသူတွေ

နေမင်းကြီးလဲ ထွက်ပြီးရော လူတွေလဲ ရှိတော့ဘူး

အမွှာညီအစ်မသစ်ပင်

ဒီဘက်တောင်ကနေ လှမ်းမြင်ရတဲ့ ကားလမ်း တောင်ပြိုတာကို ကာကွယ်ဖို့ဆောက်ထားတဲ့ တံတိုင်း

ကိုပြေအေးက ထိုင်ဝမ်က အားလီဆန်းမှာနေတဲ့ တောင်ပေါ်တိုင်းရင်းသားတွေအကြောင်း ရေးပေးပါလား ပြောလာတော့ နှင်းကိုယ်တိုင်လဲ သေသေချာချာ မလေ့လာဘူးတော့ မပြောပြတတ်ဘူးဖြစ်နေပါတယ်။ ဒါပေမယ့် အားလီဆန်းတောင်ပေါ်ကိုတော့ အလည်တစ်ခေါက်ရောက်ခဲ့ဘူးတဲ့အတွက် နှင်းသိသလောက် ပြောပြပေးတာလေးကိုတော့ ကျေနပ်နိုင်မယ်လို့ ထင်ပါတယ်။ ဒီပိုစ့်လေးကို မနှစ်ကလဲ တင်ဘူးပါတယ်။

ထိုင်ဝမ်မှာ ရောက်တုန်း သွားဖူးတဲ့ နေရာတွေကို မိတ်ဆွေတွေကို ပြောပြချင်လို့ပါ။ ဒီခရီးကို မနှစ်က ၇ လပိုင်းထဲက သွားခဲ့တာပါ။ Alishan (အားလီဆန်း)လို့ ခေါ်တဲ့ ထိုင်ဝမ်ရဲ့ အမြင့်ဆုံးတောင်ပေါ်ကိုပါ။ မနက်ခင်း ၆း၃၀ လောက်ကနေ ထိုင်ပေကနေ ကားနဲ့ ထွက်လာပြီး လမ်းမှာရှိတဲ့ သဘာဝပြတိုက်တစ်ခုကို ၀င်ရောက်လေ့လာပြီး အားလီဆန်းတောင်ပေါ်ကို ညနေ ၅း၀၀ ကျော်လောက်ရောက်ပါတယ်။ တောင်ပေါ်ဆိုပေမယ့် မြို့ငယ်လေးတစ်ခုလိုပါပဲ။

နှင်း တို့ မြန်မာပြည်က ကျိုက်ထီးရိုးကို သွားသတိရမိပါတယ်။ ဈေးဆိုင်တန်းတွေ ဟော်တယ်တွေနဲ့ တကယ်ကိုပဲ သာယာလှပါတယ်။ ထိုင်ဝမ်ရဲ့ နွေရာသီ ဖြစ်ပေမယ့် အားလီဆန်းမှာတော့ ၁၇ ဒီဂရီ နဲ့ ၂၀ ဒီဂရီစင်တီဂရိတ်လောက်ပဲရှိပါတယ်။ အားလီဆန်းကို သွားရတဲ့ အကြောင်းကတော့ အဲဒီအမြင့်ဆုံးဆိုတဲ့ တောင်ထိပ်ပေါ်ကနေ နံနက်ခင်းမှာ ထွက်ပေါ်လာမယ့် နေမင်းကို သွားရောက်ကြည့်ရှုကြတာပါပဲ။ မြန်မာပြည်ကလူတွေအနေနဲ့ကတော့ ရယ်စရာ ဖြစ်ကောင်းဖြစ်နိုင်ပါတယ်။ ထိုင်ဝမ်ကလူတွေအတွက်ကတော့ အလုပ်ကြားထဲမှာ နစ်မြုပ်နေတဲ့ဘ၀ကနေ ခဏတာ အပန်းဖြေထွက်ကြရတာမို့ စိတ်ချမ်းသာဖို့ကောင်းပါတယ်။ တောင်ပေါ်တက်လာတဲ့ တောင်တက်လမ်းက ရှုခင်းတွေဟာ မြန်မာပြည်က တောင်ကြီးဘက်ကို သွားတဲ့ ရှုခင်းတွေလိုပါပဲ။ ကမ်းပါးယံတွေကို ကပ်ပြီးဖောက်ထားတဲ့ ကားလမ်းကနေ အောက်ကိုကြည့်လိုက်ရင် ရင်ကိုအေးသွားတာပါပဲ။

တောင်တက်လမ်းတလျှောက် တက်လာရင်းကနေ တောင်ပိုမြင့်လာလေ မြူတွေဆိုင်းပြီး အအေးဓာတ်က ပိုလာပါတယ်။ တောင်စောင်းတလျှောက် လှေကားထစ် လက်ဖက်စိုက်ခင်းတွေကလဲ တမျိုးလေး လှနေပြန်ပါတယ်။ နိုင်ငံက တိုးတက်တဲ့အတွက် လက်ဖက်စိုက်တဲ့စနစ်တွေနဲ့ အသုံးပြုတဲ့ ပစ္စည်းတွေကလဲ အဆင့်မြင့်ပါတယ်။ တောင်ပေါ်ကို စတက်တဲ့ သိပ်မမြင့်တဲ့ တောင်စောင်းတွေမှာ ကွမ်းသီးခြံတွေကိုလဲ တွေ့ရပါတယ်။ ထိုင်ဝမ်မှာက မိုးရွာပြီး မြေပြိုတာများတဲ့အတွက် တောင်တက်လမ်းတွေမှာ လမ်းပြင်နေတဲ့ လူတွေကိုလဲ တွေ့ရပါတယ်။

တောင်ပေါ်ကို ညနေပိုင်းရောက်သွားတယ်ဆိုရင်ပဲ Alishan national Forest Recreation Area ဆိုတဲ့ မုဒ်ဦးကို ကျော်ပြီးတာနဲ့ ဈေးဆိုင်တန်းတွေ ဟော်တယ်တွေနဲ့ စည်ကားနေတဲ့ အားလီဆန်းကိုရောက်ပါတယ်။ ခရီးသွားရာသီမို့ အလည်လာသူတွေနဲ့ အလွန်စည်ကားနေပါတယ်။ နောက်တစ်နေ့ တောင်ပေါ်ကို မြန်မာပြည်ကလို မြို့ပတ်ရထားကလေးနဲ့ မနက်အစောကြီး တက်ခဲ့ပါတယ်။ နေမင်းကြီး မထွက်လာခင် တောင်ပေါ်ကို အမီတက်ကြတာပါ။ မနက် ၃း၃၀ လောက်ထပြီး ရထားထွက်မယ့်အချိန်ကို ဘူတာရုံမှာ သွားစောင့်ကြပါတယ်။ လူတွေအားလုံးက စည်းကမ်းတကျ တန်းစီးပြီး ရထားပေါ်ကိုတက်ပြီးတာနဲ့ ရထားကြီးက ဥသြဆွဲပြီး တောင်ပေါ်ကို စတက်ပါတယ်။ မိနစ် ၂၀ ကျော်လောက်ရထားစီးပြီးတော့ တောင်ပေါ်ဘူတာကို ရောက်ပါတယ်။ ဘူတာကနေ နေမင်းထွက်အလာကို ကြည့်တဲ့ ရင်ပြင်ဆီကို ခြေကျင်လျှောက်ကြပါတယ်။ အဲဒီနေ့က နေမင်းကြီးက ၆း ၂၀ ကျော်လောက်မှာထွက်ပါတယ်။

ရင်ပြင်ပေါ်ကိုရောက်တော့ လူအုပ်ကြီးကိုတွေ့လိုက်ရပါတယ်။ လက်ထဲမှာလဲ ကင်မရာကိုယ်စီနဲ့ နေမထွက်မီ အလှနဲ့ နေမင်းထွက်လာတဲ့ အလှတို့ကို ရိုက်ယူကြပါတယ်။ နေမင်းကြီးလဲ ထွက်လာပြီးရော အားလုံးက တောင်အောက်ကို ရထားနဲ့တမျိုး ခြေကျင်တမျိုး ဆင်းကြပါတယ်။ တောင်အောက်ကို ဆင်းတဲ့အချိန်ထိ အအေးဓါတ်ကရှိနေသေးတော့ နှင်းတို့တွေ ဟင်းချိုပူပူလေးတွေ ၀ယ်သောက်ကြတာပေ့ါ။ နှင်းတို့အဖွဲ့ကတော့ ခြေကျင်ဆင်းပြီး အားလီဆန်းရဲ့ ရှုခင်းတွေကို ကြည့်ရှုကြပါတယ်။ သဘာဝအတိုင်းဖြစ်နေတဲ့ သစ်ပင်တွေကို ကာကွယ်ပေးထားပြီး သန့်ရှင်းရေးတွေကိုလဲ သေသေချာချာ လုပ်ထားပါတယ်။ တောင်အောက်ကို နေ့လည် ၁၁း၀၀ လောက် ပြန်ရောက်ပါတယ်။

အားလီဆန်း အကြောင်းကို နေမထွက်ခင် ပြောပြပါတယ်။ အဲဒီပြောပြပေးတဲ့လူကပြောပါတယ်။ ထိုင်ဝမ်ရဲ့ အမြင့်ဆုံးနေရာမှာ နေတာက ထိုင်ဝမ်သမ္မတ မဟုတ်ပါဘူး။ သူကမှ အမြင့်ဆုံးမှာ ရှိနေတဲ့ လူပါတဲ့။ တောင်အောက်ရောက်ပြီး နေ့လည်စာစားပြီးတော့ အားလီဆန်းကို နှုတ်ဆက်ခဲ့ပါတော့တယ်။